ନୂଆଦିଲ୍ଲୀ: ଭାରତୀୟ ରାଜନୀତିରେ ପୁଣି ଥରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି କେନ୍ଦ୍ରୀୟ ମନ୍ତ୍ରୀମଣ୍ଡଳ ଓ BJP ସଂଗଠନର ସମ୍ଭାବ୍ୟ ପରିବର୍ତ୍ତନ। ପଞ୍ଜାବ ଗସ୍ତରେ ଥିବା BJPର ରାଷ୍ଟ୍ରୀୟ ଅଧ୍ୟକ୍ଷ ନିତିନ ନବୀନ ନିର୍ଦ୍ଧାରିତ କାର୍ଯ୍ୟକ୍ରମ ପୂର୍ବରୁ ହିଁ ଦିଲ୍ଲୀ ଫେରି ଆସିଥିବାରୁ ବିଭିନ୍ନ ପ୍ରକାର ଆଲୋଚନା ଆରମ୍ଭ ହୋଇଛି।
ସୂତ୍ର ଅନୁଯାୟୀ, ପଞ୍ଜାବରେ କିଛି ସଂଗଠନାତ୍ମକ ବୈଠକରେ ଯୋଗଦେବା ପରେ ସେ ହଠାତ୍ ଦିଲ୍ଲୀ ଫେରିଥିଲେ। ତାଙ୍କ ସହ କିଛି ବରିଷ୍ଠ ନେତା ମଧ୍ୟ ରାଜଧାନୀକୁ ଫେରିଥିବା ଜଣାପଡ଼ିଛି।
ଏହି ଘଟଣା ଏମିତି ଏକ ସମୟରେ ଘଟିଛି, ଯେତେବେଳେ କେନ୍ଦ୍ରୀୟ ମନ୍ତ୍ରୀମଣ୍ଡଳର ସମ୍ଭାବ୍ୟ ପୁନର୍ଗଠନ ଓ BJP ସଂଗଠନରେ ବଡ଼ ଧରଣର ପରିବର୍ତ୍ତନ ନେଇ ଚର୍ଚ୍ଚା ଜୋର ଧରିଛି।
ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ହେବାକୁ ଥିବା କେନ୍ଦ୍ରୀୟ କ୍ୟାବିନେଟ ବୈଠକକୁ ନେଇ ମଧ୍ୟ ରାଜନୈତିକ ମହଲର ନଜର ରହିଛି। ବିଭିନ୍ନ ନୀତିଗତ ପ୍ରସ୍ତାବ ସହିତ ସଂଗଠନାତ୍ମକ ନିଷ୍ପତ୍ତି ନେଇ ଆଲୋଚନା ହୋଇପାରେ ବୋଲି ଅନୁମାନ କରାଯାଉଛି।
ତେବେ ମନ୍ତ୍ରୀମଣ୍ଡଳ ବିସ୍ତାର କିମ୍ବା ସଂଗଠନରେ କାହାକୁ ନୂଆ ଦାୟିତ୍ୱ ମିଳିବ ସେନେଇ ଏପର୍ଯ୍ୟନ୍ତ କୌଣସି ଆଧିକାରିକ ସୂଚନା ସାମ୍ନାକୁ ଆସିନାହିଁ। ଆଗାମୀ କିଛି ଦିନ ମଧ୍ୟରେ BJP ପକ୍ଷରୁ ବଡ଼ ଘୋଷଣା ହୋଇପାରେ ବୋଲି ଚର୍ଚ୍ଚା ହେଉଛି।