ସୁଜାତାଙ୍କ ଯୋଗଦାନ ପରେ ଦଳର ବରିଷ୍ଠ ନେତାମାନେ ତାଙ୍କୁ ସ୍ୱାଗତ କରିଛନ୍ତି। ପ୍ରଶାସନିକ ଅଭିଜ୍ଞତା ଏବଂ ଲୋକସେବାରେ ତାଙ୍କର ଦୀର୍ଘ ଅବଦାନ ବିଜେଡିକୁ ଆହୁରି ଶକ୍ତିଶାଳୀ କରିବ ବୋଲି ଦଳୀୟ ମହଳରେ ଆଶା ପ୍ରକାଶ ପାଇଛି।
୨୦୦୦ ବ୍ୟାଚର IAS ଅଧିକାରୀ ଭାବେ ସୁଜାତା କାର୍ତ୍ତିକେୟନ ଓଡ଼ିଶାର ବିଭିନ୍ନ ଜିଲ୍ଲା ଓ ବିଭାଗରେ କାର୍ଯ୍ୟ କରିଛନ୍ତି। ସୁନ୍ଦରଗଡ଼ ଜିଲ୍ଲାପାଳ ଥିବାବେଳେ ଛାତ୍ରୀମାନଙ୍କ ପାଇଁ ସାଇକେଲ ଯୋଜନା ଆରମ୍ଭ କରିବା ସହ ମଧ୍ୟାହ୍ନ ଭୋଜନରେ ଅଣ୍ଡା ସାମିଲ କରିବା ପରି ପଦକ୍ଷେପ ନେଇଥିଲେ। ଏହା ସହ ଖେଳକୁ ପ୍ରୋତ୍ସାହନ ଦେବାରେ ମଧ୍ୟ ସେ ଅନେକ ଉଦ୍ୟମ କରିଥିଲେ।
ମିଶନ ଶକ୍ତି ବିଭାଗର ସଚିବ ଭାବେ କାର୍ଯ୍ୟକାଳ ସମୟରେ ସେ ମହିଳା ସଶକ୍ତିକରଣ କ୍ଷେତ୍ରରେ ଉଲ୍ଲେଖନୀୟ କାମ କରିଥିଲେ। ସ୍ୱୟଂ ସହାୟକ ଗୋଷ୍ଠୀ (SHG) ମାଧ୍ୟମରେ ଲକ୍ଷାଧିକ ମହିଳାଙ୍କୁ ଆର୍ଥିକ ଭାବେ ସ୍ୱାବଲମ୍ବୀ କରିବାରେ ତାଙ୍କ ଭୂମିକା ପ୍ରଶଂସନୀୟ ରହିଛି।
ଏହି ଅବସରରେ ନବୀନ ପଟ୍ଟନାୟକ କହିଛନ୍ତି ଯେ, ଆଗାମୀ ନିର୍ବାଚନରେ ସେ ନିଜେ ଦଳର ନେତୃତ୍ୱ ନେବେ। ସୁଜାତା ଜଣେ ସାଧାରଣ କର୍ମୀ ଭାବେ ଦଳରେ କାମ କରିବେ ଏବଂ ତାଙ୍କର ଅଭିଜ୍ଞତା ବିଜେଡି ପାଇଁ ଲାଭଦାୟକ ହେବ ବୋଲି ସେ କହିଛନ୍ତି।
ସୁଜାତା କାର୍ତ୍ତିକେୟନ ମଧ୍ୟ କହିଛନ୍ତି ଯେ, ନବୀନ ପଟ୍ଟନାୟକଙ୍କ ନେତୃତ୍ୱରେ ସେ ଦୀର୍ଘ ୨୪ ବର୍ଷ ଧରି ରାଜ୍ୟ ସେବା କରିଆସୁଥିଲେ। ଏବେ ବିଜୁ ଜନତା ଦଳର ଜଣେ କର୍ମୀ ଭାବେ ରାଜ୍ୟବାସୀଙ୍କ ସେବା କରିବାର ସୁଯୋଗ ପାଇଥିବାରୁ ସେ ଖୁସି ବ୍ୟକ୍ତ କରିଛନ୍ତି। ନିଷ୍ଠା ଓ ସମର୍ପଣ ସହ ଲୋକଙ୍କ ପାଇଁ କାମ କରିବେ ବୋଲି ସେ ପ୍ରତିଶ୍ରୁତି ଦେଇଛନ୍ତି।
Tags
ରାଜନୀତି